 |
‘O S I L E N Z I O
A che parte sta ‘e casa ‘o silenzio? L’hê maje visto, saie dì comm’è fatto? È nu cunto ca sape ‘e nnucenza raccuntato ‘a na vecchia distratta.
Sta int’â chiesia prianno a nu santo annascosta int’a n’angulo ô scuro cunzumata d”a famma e d”o chianto cerca ‘a grazia ma parla cu ‘o muro.
È silenzio na scola mpruggetto quanno ‘e sorde già songo spartute. E’ silenzio nu pate c’aspetta na fatica e ‘a fatica è fernuta.
È silenzio ‘o silenzio ‘e sta gente se fa chiovere ncuollo ‘a tantanne e nun parla, nu dice maje niente, e si parla nun sape parlà.
È silenzio na nenia ‘e clarino pecché spanne mutive ‘e prugresso pe’ sta via ca na folla ncammino nun cammina, si pure va ‘e pressa. |
